စက်တင်ဘာ ၁၄ ရက်နေ့ အထိ နောက်ဆုံး ရရှိထားသမျှ စီးရီးအေ သတင်း တချို့ကို ဆက်လက် ဖော်ပြပေးသွားမှာ ဖြစ်ပါတယ်။
အင်တာမီလန် နိုင်ပွဲ ပြန်ရှာတွေ့ခဲ့တဲ့ ချန်ပီယံလိဂ်ည
မနေ့ညက ကစားခဲ့တဲ့ ချန်ပီယံလိဂ် ပွဲစဥ်တွေ မှာတော့ စီးရီးအေ အသင်း တသင်း ဖြစ်တဲ့ အင်တာမီလန်က အဝေးကွင်းမှာ ဗစ်တိုးရီးယား ပါလ်ဇန်ကို အနိုင်ယူပြီး ဒီရာသီ ပထမဆုံး ချန်ပီယံလိဂ် နိုင်ပွဲကို ရရှိခဲ့ပါတယ်။ အင်တာမီလန်ဟာ အုပ်စု အဖွင့်ပွဲမှာ ဘေယန်မြူးနစ်ကို အိမ်ကွင်းမှာ နှစ်ဂိုးပြတ်နဲ့ ရှုံးနိမ့်ခဲ့တာပါ။
အခု အုပ်စုတွင်း အင်အား အနည်းဆုံး ပြိုင်ဘက်နဲ့ တွေ့ဆုံချိန်မှာတော့ အင်တာမီလန်တို့ အခွင့်အရေးကို အမိအရ အသုံးချပြီး အနိုင်ကစားခဲ့တာပါ။ အင်တာမီလန် အတွက် ဂိုးတွေ ကိုတော့ ပထမပိုင်းမှာ တိုက်စစ်မှူး ဒီဂျက်ကို၊ ဒုတိယပိုင်းမှာ ညာနောက်ခံလူ ကစားသမား ဒမ်းဖရီးစ် တို့က သွင်းယူပေးခဲ့ပါတယ်။
ဒီပွဲရဲ့ ပွဲကစားချိန် (၆၁) မိနစ် မှာတော့ ဗစ်တိုးရီးယားပါလ်ဇန် ကစားသမား ဘူချာ အနီကတ်နဲ့ အထုတ်ခံခဲ့ရပါတယ်။
မိုဒရစ် နေရာမှာ အစားထိုးဖို့ အင်တာ ကွင်းလယ်လူကို မျက်စိကျနေတဲ့ အန်ဆယ်လော့တီ
ရီးရဲလ်မက်ဒရစ် နည်းပြ ကာလိုအန်ဆယ်လော့တီက အသက်အရွယ် ရလာတဲ့ ကွင်းလယ်လူ လူကာမိုဒရစ်ရဲ့ နေရာကို ရေရှည် အစားထိုးဖို့ အတွက် စီးရီးအေ ကလပ် အင်တာမီလန် ကွင်းလယ်လူ နီကိုလို ဘာရယ်လာကို ခေါ်ယူဖို့ အသင်းထံ တောင်းဆိုထားကြောင်း စပိန် သတင်းရင်းမြစ်တွေက ဆိုပါတယ်။
မိုဒရစ်ဟာ အသက် (၃၇) နှစ်ရှိနေပြီး ပုံစံကောင်းပြနေဆဲ ဖြစ်သည့်တိုင် သူ့နေရာ အတွက် အစားထိုးမယ့် ကစားသမားကို စတင်စဥ်းစားနေရပြီဖြစ်ပါတယ်။ ရီးရဲလ်မက်ဒရစ်ဟာ လက်ရှိ ကွင်းလယ်လူ အက်ဒွါဒို ကာမင်ဗင်ဂါ၊ အော်ရီလီယန် ချူအာမန်နီတို့ကို ခေါ်ယူ အားဖြည့်ထားပြီး ဖြစ်ပါတယ်။
ဒါဟာ မိုဒရစ်၊ တိုနီကရူးစ်တို့ခေတ်လွန်အတွက် ကြိုတင် ပြင်ဆင်နေတာဖြစ်ပြီး စီးရီးအေ ကွင်းလယ်လူ ဘာရယ်လာ ကိုလည်း မိုဒရစ်နေရာ အစားထိုးနိုင်မယ့် ကစားသမား အဖြစ် အန်ဆယ်လော့တီက ယူဆထားပါတယ်။
အီတလီ လက်ရွေးစင် ကွင်းလယ်လူကို လစ်ဗာပူးလ် အပါအဝင် ဥရောပ ထိပ်တန်း အသင်း အများအပြားရဲ့ စောင့်ကြည့်ခြင်းကို ခံနေရပြီး အင်တာမီလန် ကတော့ ဒီကစားသမား အတွက် ပြောင်းရွှေ့ကြေး ယူရိုသန်း (၅၀) အနည်းဆုံး သတ်မှတ်ထားပါတယ်။
ပျင်းရိတဲ့ ကစားသမားအဖြစ် ဝေဖန်ခံနေရတဲ့ ဂျူဗင်တပ်စ် တိုက်စစ်မှူး
ဂျူဗင်တပ်စ် တိုက်စစ်မှူး မွိုက်စ် ကင်းန်ကို ပျင်းရိတဲ့ ကစားသမား အဖြစ် အီတလီ မီဒီယာတွေက ဝေဖန် ထိုးနှက်လျက် ရှိပါတယ်။ အဆိုပါ တိုက်စစ်မှူးဟာ ဆလာနီတာနာနဲ့ နှစ်ဂိုးစီ သရေကျခဲ့တဲ့ စီးရီးအေ ပွဲမှာ ပထမပိုင်းပြီးတည်းက လူစားလဲခံခဲ့ရပါတယ်။
ဒီပွဲမှာ ကင်းန် နေရာကို လူစားဝင်လာတဲ့ မီလစ်ခ်ရဲ့ နောက်ဆုံး မိနစ် အနိုင်ဂိုးကို ခွင့်ပြုမခံရခြင်း၊ မီလစ်ခ် အပါအဝင် ကွာဒရာဒို၊ နည်းပြ အယ်လ်ဂရီတို့ အထုတ်ခံရခြင်းတို့ ရှိခဲ့ပေမယ့် အီတလီ မီဒီယာတွေ ကတော့ ကင်းန်ကိုလည်း ပစ်မှတ်ထား ဝေဖန်ခဲ့ပါတယ်။
ဒီကစားသမားဟာ ဒီရာသီမှာ အသင်းနဲ့ ပထမဆုံး ပွဲထွက်ခွင့် ရရှိခဲ့ပေမယ့် ဒီအခွင့်အရေးကို ဖြုန်းတီးခဲ့ပြီး ကွင်းထဲမှာ အပျင်းကြီးနေခဲ့တယ်လို့ ဝေဖန်နေကြတာပါ။ ကင်းန်ဟာ ဂျူဗင်တပ်စ်ကို (၂) နှစ် အငှားစာချုပ်နဲ့ လာရောက် ကစားနေတာ ဖြစ်ပြီး လာမယ့် နွေရာသီမှာတော့ ဂျူဗင်တပ်စ်က သူ့ကို ပြောင်းရွှေ့ကြေး ပေါင် (၂၄) သန်း ဝန်းကျင်နဲ့ အပြီးသတ် ခေါ်ယူနိုင်မှာ ဖြစ်ပါတယ်။
ဒါပေမယ့်လည်း အဆိုပါ စီးရီးအေ ကလပ်အနေနဲ့ ကင်းန်ကို အပြီးသတ် ခေါ်ယူမလား၊ မခေါ်ယူဘူးလား ဆိုတာ ကိုတော့ ကစားသမားရဲ့ စွမ်းဆောင်ရည် အပေါ် ဆက်လက် စောင့်ကြည့်ပြီးမှ ဆုံးဖြတ်သွားဖွယ် ရှိပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.
