ကစားခွင့်မပေးလို့ ပေါက်ကွဲနေတဲ့ ရစ်ချာလီဆန်၊ အမျိုးသမီး တစ်ဦးကို မဖွယ်မရာ လုပ်ခဲ့ပေမယ့် ပုံမှန် လေ့ကျင့်ခန်းဆင်းနေတဲ့ ဝေါလ်ကာ (ပရီးမီးယားလိဂ် နောက်ဆုံးရ သတင်းများ)

ကစားခွင့်မပေးလို့ ပေါက်ကွဲနေတဲ့ ရစ်ချာလီဆန်၊ အမျိုးသမီး တစ်ဦးကို မဖွယ်မရာ လုပ်ခဲ့ပေမယ့် ပုံမှန် လေ့ကျင့်ခန်းဆင်းနေတဲ့ ဝေါလ်ကာ စတဲ့ သတင်းတွေ အပါအဝင် မတ် ၉ ရက်နေ့ရဲ့ ပရီးမီးယားလိဂ် သတင်း တချို့ကို ဖော်ပြပေးသွားမှာ ဖြစ်ပါတယ်။

ကစားခွင့် မပေးလို့ ပေါက်ကွဲနေတဲ့ ရစ်ချာလီဆန်

ပရီးမီးယားလိဂ် ကလပ် တော့တင်ဟမ်ဟော့စပါး တိုက်စစ်မှူး ရစ်ချာလီဆန် ကတော့ ညက ကစားခဲ့တဲ့ အေစီမီလန်နဲ့ ပွဲမှာ သူ့ကို ပွဲထွက်ခွင့် မပေးခဲ့တဲ့ နည်းပြ အန်တိုနီယို ကွန်တီကို မေးခွန်းထုတ်သွားခဲ့ပါတယ်။ ဒီရာသီမှာ စပါးကို ပေါင် ၅၆ သန်းနဲ့ ရောက်ရှိလာခဲ့ပေမယ့် ရစ်ချာလီဆန် ကတော့ ချန်ပီယံလိဂ် မှာသာ ၂ ဂိုးတည်း ရရှိထားတာ ဖြစ်ပါတယ်။

ညက အဆုံးအဖြတ်ပွဲ မှာလည်း သူ ဝင်မကစားရတဲ့ အပေါ် ရစ်ချာလီဆန်က အခုလိုမျိုး ပြောခဲ့ပါတယ်။ “ တကယ်ပါ၊ ဒီရာသီက ကျက်သရေ တုံးလွန်းပါတယ်၊ ကျနော် ကစားချင်တယ်၊ ကွန်တီက ဘာလို့ ကျနော့်ကို မရွေးချယ်တာလဲဆိုတာကို နားမလည်ဘူး၊ လက်ရှိမှာ ကျနော်က အပေါင်း လက္ခဏာဆန်တဲ့ အခြေအနေပါ”

“ မနေ့က သူ ကျနော့်ကို ပွဲထွက်စာရင်းမှာ စမ်းသပ် ထည့်သွင်းခဲ့ပြီး အဲဒီနောက်ကျ အရန်ခုံပဲ ပို့ထားပြန်တယ်” လို့ ရစ်ချာလီဆန်က ပြောခဲ့ပါတယ်။ စပါး ကတော့ အေစီနဲ့ ဂိုးမရှိ သရေသာ ကစားနိုင်ခဲ့လို့ နှစ်ကျော့ပေါင်း ရလဒ် ၁-၀ နဲ့ အရေးနိမ့်ကာ ပြိုင်ပွဲက ထွက်ခဲ့ရပြီ ဖြစ်ပါတယ်။

ဝေဖန်ခံနေရတဲ့ ဖာနန်ဒက်စ်က အသင်းခေါင်းဆောင် ဆက်ဖြစ်နေမယ်လို့ တန်ဟက်ဂ် အတည်ပြု

မန်ချက်စတာယူနိုက်တက် နည်းပြ အဲရစ်ခ် တန်ဟက်ဂ်က လက်ရှိမှာ ဝေဖန်မှုတွေနဲ့ ရင်ဆိုင်နေရတဲ့ ကွင်းလယ်လူ ဘရူနို ဖာနန်ဒက်စ်ဟာ အသင်းခေါင်းဆောင် ဟယ်ရီမက်ဂွိုင်းယား မကစားနိုင်ချိန်မှာ အသင်းခေါင်းဆောင် တာဝန်ကို ဆက်ယူရလိမ့်မယ်လို့ အတည်ပြု ပြောဆိုလိုက်ပါတယ်။

လစ်ဗာပူးလ်နဲ့ ပွဲမှာ ဖာနန်ဒက်စ်ရဲ့ body language နဲ့ ပတ်သက်ပြိး ဝေဖန်မှုတွေ ရှိနေကာ အသင်းခေါင်းဆောင် ရာထူးပေးဖို့ မတန်ဘူးလို့ ပြောဆိုမှုတွေ ထွက်ပေါ်လာခဲ့ပါတယ်။ ဒါပေမယ့် တန်ဟက်ဂ် ကတော့ သူ့ကစားသမားကို ယုံကြည်မှု အပြည့်ရှိနေပြီး ဖာနန်ဒက်စ်ရဲ့ အသင်း အတွက် နိုင်လိုစိတ် ပြင်းပြမှု အပေါ်မှာ သဘောကျနေဆဲ ဖြစ်ပါတယ်။

“ သူက ဒီရာသီမှာ အရမ်းကောင်းအောင် ကစားပြနေပြီး သူကစားတဲ့ နေရာက အသင်း အတွက် အရမ်း အရေးကြီးပါတယ်၊ အသင်းက လက်ရှိ အဆင့်မှာ ရှိနေတာလည်း အဲဒါကြောင့်ပါ၊ အသင်း အတွက် သူက စွမ်းအင်တွေ ပေးပြီး မှန်ကန်တဲ့ လမ်းကြောင်းပေါ် တင်ပေးနေတာပါ၊ ဘယ်သူမှ ပြီးပြည့်စုံတာမျိုး မရှိပါဘူး၊ အားလုံးက သင်ယူစရာတွေ ရှိပါတယ်၊ သူက အသင်းခေါင်းဆောင် ဆက်ဖြစ်နေဦးမှာပါ” လို့ တန်ဟက်ဂ်က ပြောခဲ့ပါတယ်။

အမျိုးသမီး တစ်ဦးကို မဖွယ်မရာ လုပ်ခဲ့ပေမယ့် ပုံမှန် လေ့ကျင့်ခန်းဆင်းနေတဲ့ ဝေါလ်ကာ

မန်ချက်စတာမြို့က ဘားတခုမှာ အရက်သေစာ သောက်သုံးပြီးနောက် သူ့ဇနီး မဟုတ်တဲ့ အခြား အမျိုးသမီး တစ်ဦးကို လိင်ပိုင်းဆိုင်ရာ မဖွယ်မရာ ပြုလုပ်ခဲ့တဲ့ မန်ချက်စတာစီးတီး နောက်ခံလူ ကိုင်လီ ဝေါလ်ကာဟာ အသင်းနဲ့အတူ လေ့ကျင့်ခန်းဆင်းနေပါတယ်။

ဝေါလ်ကာဟာ အဆိုပါ အမျိုးသမီးကို နောက်ကနေ သိုင်းဖက်ကာ မဖွယ်မရာ ထိတွေ့မှုတွေ လုပ်ခဲ့လို့ ဝေဖန်ခံနေရတာ ဖြစ်ပါတယ်။ CCTV က တဆင့် သူ့ရဲ့ လုပ်ရပ်ကို အတိုင်းသား မြင်တွေ့ခဲ့ရတာ ဖြစ်ပြီး ပြစ်မှု ထင်ရှားရင် သူဟာ ထောင်ဒဏ် ၂ နှစ် အထိ ချမှတ်ခံရနိုင်တယ်လို့ The Sun က ဖော်ပြခဲ့ပါတယ်။

ဒါပေမယ့် ကိုင်လီ ဝေါလ်ကာ ကတော့ ပရီးမီးယားလိဂ် ကလပ်နဲ့ အတူ ပုံမှန် လေ့ကျင့်ခန်းဆင်းနေဆဲ ဖြစ်ပါတယ်။ ချက်ရှိုင်းယား ရဲတပ်ဖွဲ့ ကတော့ လက်ရှိမှာ စုံစမ်းမှုတွေ ပြုလုပ်နေပြီ ဖြစ်ပါတယ်။ ဝေါလ်ကာဟာ ရွှေအိုရောင် ဆံပင်နဲ့ အမျိုးသမီးရဲ့ ရင်သားကို ပွတ်သပ် ကိုင်တွယ်ခဲ့ပြီး နမ်းရှုံ့မှုတွေလည်း ပြုလုပ်ခဲ့တာ ဖြစ်ပါတယ်။

 

●●●

နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS

အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်

ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.