ပရီးမီးယားလိဂ် – နောက်ဆုံးရ သတင်းများ (၂၂/၈/၂၀၂၂)

ဩဂုတ်လ ၂၂ ရက်နေ့ အထိ နောက်ဆုံး ရရှိထားတဲ့ ပရီးမီးယားလိဂ် သတင်း တချို့ကို ဆက်လက် ဖော်ပြပေးသွားမှာ ဖြစ်ပါတယ်။

တေးလီမန့်စ်ကို ဒုတိယအကြိမ် ကမ်းလှမ်းတော့မယ့် အာဆင်နယ်

ပရီးမီးယားလိဂ် ကလပ် အာဆင်နယ် အသင်း ကတော့ လက်စတာစီးတီး ကွင်းလယ်လူ ယူရီ တေးလီမန့်စ်ကို လာမယ့် တစ်ပတ်အတွင်း ဒုတိယအကြိမ်မြောက် ကမ်းလှမ်းမှု ပြုလုပ်သွားမယ်လို့ သိရပါတယ်။ သတင်းတွေ အရ ဆိုရင် အာဆင်နယ်တို့ တေးလီမန့်စ်ကို ပထမအကြိမ်တုန်းက နှုတ်အားဖြင့် ကမ်းလှမ်းမှု ပြုလုပ်ခဲ့တာ ဖြစ်ပြီး လက်စတာစီးတီး ဘက်က ပေါင် ၃၅ သန်းနီးပါး ရရှိမှသာ ရောင်းထုတ်သွားမယ်လို့ အကြောင်းပြန်ထားခဲ့တယ်လို့လည်း သိရပါတယ်။

လက်တလော အာဆင်နယ် အသင်းဟာ ပရီးမီးယားလိဂ် ပွဲစဉ် ၃ ပွဲ ကစားပြီးချိန်မှာ ရာနှုန်းပြည့် နိုင်ပွဲနဲ့အတူ အမှတ်ပေးဇယား ထိပ်ဆုံးမှာ ရပ်တည်နေပြီး အမှတ်ပေးချန်ပီယံဆုကိုပါ ခြိမ်းခြောက်နိုင်မယ့် အသင်း အဖြစ် သတ်မှတ်ခံထားရပါတယ်။ ဒါပေမယ့်လည်း နည်းပြ မီခဲလ် အာတေးတား ကတော့ သူ့ရဲ့ အသင်းကို အင်အား ဖြည့်တင်းမှုတွေ ပြုလုပ်လိုဆဲ ဖြစ်ပြီး အပြောင်းအရွှေ့ ဈေးကွက် မပိတ်မီ ကွင်းလယ်နဲ့ တောင်ပံ ကစားသမား ၁ ဦးစီ ထပ်မံ ခေါ်ယူဖို့ ကြိုးပမ်းနေတာ ဖြစ်ပါတယ်။

အာဆင်နယ်နဲ့ နီးစပ်တဲ့ အသိုင်းအဝိုင်းက လာတဲ့ သတင်းတွေ အရ အာဆင်နယ်ရဲ့ ကွင်းလယ် ပစ်မှတ် ကစားသမား စာရင်းမှာ လက်စတာက ယူရီ တေးလီမန့်စ်၊ ဘရိုက်တန်က ကိုင်စီဒိုနဲ့ အေစီမီလန်က တိုနာလီတို့ ပါဝင်နေပြီး တောင်ပံ အတွက် ကိုတော့ ဗီလာရီးရဲယ်က ရယ်ယီမီ ပီနို၊ ရှက်တာဒိုးနတ်စ်က မိုင်ခိုင်လို မူဒရစ်ခ်နဲ့ ပီအက်စ်ဗွီ အင်ဟိုဗင်က ကိုဒီ ဂတ်ခ်ပိုကို ပစ်မှတ်ထားနေတယ်လို့ သိရပါတယ်။

‘ရူနီဟာ ရော်နယ်ဒိုကို တစ်ချိန်လုံး မနာလိုဖြစ်နေသူ’ လို့ ဆိုလိုက်တဲ့ ပီယာ့စ် မော်ဂန်

ဝိန်းရူနီဟာ ရော်နယ်ဒိုကို တစ်ချိန်လုံး မနာလို ဖြစ်နေတယ်လို့ နာမည်ကျော် အစီအစဉ် တင်ဆက်သူ ပီယာ့စ် မော်ဂန်က ဝေဖန် ပြောဆိုလိုက်ပါတယ်။ မေဂျာလိဂ် ကလပ် ဒီစီယူနိုက်တက်ရဲ့ နည်းပြ ဝိန်းရူနီက ပြီးခဲ့တဲ့ ရက်ပိုင်းက လစ်ဗာပူးလ်နဲ့ ပရီးမီးယားလိဂ် ပွဲ လူစာရင်းမှာ ခရစ္စတီယာနို ရော်နယ်ဒိုကို ပွဲထွက်လူစာရင်း ကနေ ချန်ထားဖို့ တိုက်တွန်းခဲ့တာနဲ့ ပတ်သတ်ပြီး ပီယာ့စ်မော်ဂန်က ပြန်လည် တုံ့ပြန်သွားခဲ့တာ ဖြစ်ပါတယ်။

မော်ဂန်က “၂၈ ရာခိုင်နှုန်းပဲ အနိုင်ရထားတဲ့ ရူနီရဲ့ မန်နေဂျာ မှတ်တမ်း ကိုလည်း ကြည့်ပါဦးဗျာ။ မနေ့က သူ့ရဲ့ ဒီစီယူနိုက်တက်က ၆-၀ နဲ့ ရှုံးသွားတယ်။ ဒီလို ပုံစံနဲ့ သူ့ရဲ့ အကြံပေးမှုကို ဘယ်လို လက်ခံရမလဲ။ ရူနီရဲ့ ကစားသမားဘဝ အောင်မြင်မှု၊ ကြံ့ခိုင်မှုနဲ့ ဘောလုံး အခြေခံပါရမီက ရော်နယ်ဒိုကို မမီပါဘူး။ သူက ရော်နယ်ဒိုက တစ်ချိန်လုံး မနာလိုဖြစ်နေတာဗျ” လို့ သူ့ရဲ့ တွစ်တာ စာမျက်နှာ ကတစ်ဆင့် တုန့်ပြန် ရေးသားသွားခဲ့တာ ဖြစ်ပါတယ်။

ရူနီက လစ်ဗာပူးလ်နဲ့ ပွဲမှာ ခွန်အားကောင်းတဲ့ ကစားသမားတွေကို အသုံးပြုဖို့ လိုအပ်ကြောင်းနဲ့ သူသာ တန်ဟက်ဂ်နေရာမှာ ဆိုရင် ရော်နယ်ဒိုနဲ့ ရက်ရှ်ဖို့ဒ် တို့ကို ပွဲထွက်လူစာရင်း ကနေ ချန်လှပ်သွားမှာ ဖြစ်ကြောင်း ပြောကြားသွားခဲ့တာ ဖြစ်ပါတယ်။ ပီယာ့စ် မော်ဂန် ကတော့ ရော်နယ်ဒိုနဲ့ ပုဂ္ဂိုလ်ရေး အရ အလွန် ရင်းနှီးသူတွေ ဖြစ်ပြီး ပေါ်တူဂီ တိုက်စစ်မှူးကြီးကို အမြဲတမ်းလိုလို ချီးကျူးတတ်သလို ဝေဖန်မှုတွေ ရှိလာရင်လည်း ချက်ချင်း ဆိုသလို ပြန်လည် တုန့်ပြန်တတ်သူလည်း ဖြစ်ပါတယ်။

ဒဏ်ရာရ ကစားသမား များနေပေမယ့် လူသစ် ထပ်ခေါ်သွားမှာ မဟုတ်ကြောင်း ပြောကြားခဲ့တဲ့ ကလော့ပ်

ပရီးမီးယားလိဂ် ကလပ် လစ်ဗာပူးလ် အနေနဲ့ အသင်းမှာ ဒဏ်ရာရ ကစားသမားတွေ များပြားနေပေမယ့် နည်းပြ ဖြစ်သူ ဂျာဂျင် ကလော့ပ် ကတော့ ကစားသမားသစ် ထပ်မံ ခေါ်ယူဖို့ မရှိဘူးလို့ ပြောကြားသွားခဲ့ပါတယ်။

မန်ချက်စတာယူနိုက်တက်နဲ့ ပရီးမီးယားလိဂ် ပွဲစဉ် မကစားမီ ကလော့ပ်က သူ့ရဲ့ အသင်းမှာ ထင်ထားတာထက် ပိုပြီး ဒဏ်ရာရ ကစားသမားတွေ များပြားနေကြောင်း ကွင်းလယ် ကစားသမား တစ်ဦး ထပ်ရရင်‌ ကောင်းပေမယ့် လက်ရှိ အတိုင်းပဲ ဆက်သွားမယ့် သဘောမျိုးနဲ့ ပြောကြားသွားခဲ့တာ ဖြစ်ပါတယ်။

လစ်ဗာပူးလ်မှာ လက်တလော ကစားသမား စုစုပေါင်း ၇ ဦး အထိ ဒဏ်ရာရနေပြီး ဒါဝင် နူညက်ဇ် ကလည်း ပဲလေ့စ်နဲ့ ပွဲမှာ ရခဲ့တဲ့ အနီကတ်ကြောင့် ပွဲပယ် ပြစ်ဒဏ်ကျခံနေရပါတယ်။ လစ်ဗာပူးလ်ရဲ့ ဒဏ်ရာရ ကစားသမား စာရင်းမှာတော့ သီယာဂို အဲလ်ကန်တာယာ၊ ဂျိုးဝဲလ် မက်တစ်ပ်၊ အီဘရာဟီမာ ကိုနာတေး၊ ဒီယိုဂို ဂျိုတာ၊ ကာတစ် ဂျုံးစ်၊ အဲလက်စ် အောက်စ်လိတ်ဒ် ချိမ်ဘာလိန်နဲ့ ခယ်လာဟာ တို့ ပါဝင်နေပါတယ်။

 

●●●

နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS

အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်

ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.