ချန်ပီယံလိဂ် ပုံစံသစ်က မန်စီးတီး အတွက် မယုံကြည်နိုင်စရာ သင်ခန်းစာ တစ်ခု ဖြစ်ခဲ့တယ်လို့ မန်ချက်စတာစီးတီး နည်းပြ ပပ် ဂွါဒီယိုလာက ဝန်ခံ ပြောဆိုလိုက်ပါတယ်။ မန်စီးတီး ကတော့ ချန်ပီယံလိဂ် လိဂ် အဆင့် နောက်ဆုံး ပွဲစဉ်မှာ ကလပ်ဘရုဂေးကို အနိုင်ရရှိခဲ့ပြီးနောက် ရီးရဲလ်မက်ဒရစ် သို့မဟုတ် ဘေယန်မြူးနစ်နဲ့ ရင်ဆိုင်ရတော့မှာလည်း ဖြစ်ပါတယ်။
မန်ချက်စတာစီးတီးဟာ ၁၆ သင်း အဆင့်ကို တက်လှမ်းနိုင်ဖို့ ပလေးအော့ဖ်ကို ဖြတ်ကျော်ရတော့မှာ ဖြစ်ပြီး ပြိုင်ဘက်ကောင်းတွေနဲ့ ရင်ဆိုင်ရတော့မှာလည်း ဖြစ်ပါတယ်။ ဒါကြောင့် ဒီနှစ်မှ ပြောင်းလဲ ကျင်းပခဲ့တဲ့ ချန်ပီယံလိဂ် ပုံစံသစ်က မယုံကြည်နိုင်စရာ သင်ခန်းစာ တစ်ခု ဖြစ်တယ်လို့ ဂွါဒီယိုလာက ယုံကြည်နေတာလည်း ဖြစ်ပါတယ်။
မန်စီးတီးဟာ ညက ကစားခဲ့တဲ့ ကလပ် ဘရုဂေးနဲ့ ပွဲစဉ်မှာ ပြိုင်ဘက် ကွင်းလယ်လူ အွန်ရီဒီကာရဲ့ ဦးဆောင်ဂိုးကြောင့် နောက်ကနေ လိုက်ကစားခဲ့ရပေမယ့် ကိုဗာချစ်၊ အော်ဒိုနက်ဇ် (OG) နဲ့ ဆာဗင်ဟို တို့ရဲ့ သွင်းဂိုးတွေကြောင့် ဂိုးပြတ် နိုင်ပွဲ ရရှိခဲ့တာ ဖြစ်ပါတယ်။ ဒီပွဲမှာ မန်စီးတီးက မဖြစ်မနေ အနိုင်ရဖို့ လိုအပ်ခဲ့တာ ဖြစ်ပြီး ၁၂ ရာသီ ဆက်တိုက် ချန်ပီယံလိဂ် ရှုံးထွက်အဆင့်ကို တက်လှမ်းနိုင်ခဲ့တာ ဖြစ်ပါတယ်။
ဒါ့အပြင် မန်ချက်စတာစီးတီး လိုပဲ ဘေယန်မြူးနစ်၊ ရီးရဲလ်မက်ဒရစ်နဲ့ ပီအက်စ်ဂျီ တို့ကလည်း ၂၀၁၃-၂၀၁၄ ဘောလုံးရာသီက စပြီး ရာသီတိုင်းမှာ ချန်ပီယံလိဂ် ရှုံးထွက်အဆင့်ကို တက်လှမ်းနိုင်ခဲ့တဲ့ အသင်းတွေ ဖြစ်ခဲ့ပါတယ်။ ဒါပေမယ့်လည်း မန်စီးတီးက ဒီနှစ် ချန်ပီယံလိဂ် မှာတော့ အားရစရာ ပုံစံမျိုး မရှိခဲ့ပဲ ဆဲလ်တစ်၊ ဖီယင်နော့ဒ်၊ ဘရက်စ်၊ ပီအက်စ်ဗွီ၊နဲ့ လိုင်လီ တို့လို အသင်းတွေရဲ့ အနောက် ကနေ အဆင့် ၂၂ နေရာနဲ့ ရှုံးထွက် ပလေးအော့ဖ် အဆင့်ကို ရောက်ရှိခဲ့တာ ဖြစ်ပါတယ်။ မန်စီးတီးဟာ ချန်ပီယံလိဂ် လိဂ်အဆင့် ပွဲစဉ် ၈ ပွဲ ကစားပြီး ၃ ပွဲနိုင်၊ ၂ ပွဲ သရေ၊ ၃ ပွဲ ရှုံးကာ ၁၁ မှတ်သာ ရရှိခဲ့တာ ဖြစ်ပါတယ်။
ဒီအခြေအနေနဲ့ ပတ်သတ်လို့တော့ နည်းပြ ဖြစ်သူ ပပ် ဂွါဒီယိုလာက “ကျွန်တော် မကြိုက်ဘူးလို့ပဲ ပြောချင်ပါတယ်။ ဘာလို့လဲ ဆိုတော့ ကျွန်တော်တို့ အများကြီး ခံစားခဲ့ရလို့ပါ။ ကျွန်တော်တို့ ၄၅ မိနစ်လောက် ကစားပြီးချိန်မှာ ထွက်ရမယ့် ခံစားချက်မျိုး ရခဲ့ပါတယ်။ ဒါဟာ ကျွန်တော်နဲ့ ကျွန်တော့်ရဲ့ ကစားသမားတွေ အတွက်တော့ မယုံနိုင်စရာ သင်ခန်းစာ တစ်ခုပါပဲ။” လို့ ပြောကြားခဲ့တာ ဖြစ်ပါတယ်။
ချန်ပီယံလိဂ် ပလေးအော့ဖ် မဲခွဲပွဲ ကတော့ လာမယ့် သောကြာနေ့ ဆွစ်ဇာလန် နိုင်ငံမှာ ကျင်းပမှာ ဖြစ်ပြီးတော့ ဥရောပရဲ့ ဟဲဗီးဝိတ်တွေ ဖြစ်တဲ့ ဘေယန်မြူးနစ် သို့မဟုတ် ရီးရဲလ်မက်ဒရစ် တို့နဲ့ တွေ့ဆုံရတော့မှာ ဖြစ်ပါတယ်။ မန်စီးတီးရဲ့ ဒီရာသီ ခြေစွမ်းအရ အခုလို ထိပ်တန်း အသင်းတွေနဲ့ တွေ့ဆုံရာမှာ ခက်ခဲနိုင်ပေမယ့် ခံစစ် ပိုင်း အပြင် တခြားသော နေရာတွေ အတွက်ပါ အားဖြည့်မှုတွေ ပြုလုပ်ထားတာကြောင့် စောင့်ကြည့်ရမှာ ဖြစ်ပါတယ်။
လိဂ်အဆင့်မှာ ကတည်းက ကစားဖို့ အရည်အချင်း မပြည့်မီခဲ့တဲ့ ကစားသမားသစ် အိုမာ မာမွတ်ရှ်၊ ကူဆာနော့ဗ်နဲ့ ဗစ်တာ ရိစ် တို့ဟာ မန်စီးတီးရဲ့ ပလေးအော့ဖ် ပွဲစဉ်တွေ အတွက်လည်း ကစားနိုင်မှာ ဖြစ်ပါတယ်။ ဒါပေမယ့် မန်စီးတီး ကတော့ ဒဏ်ရာရ ကစားသမားတွေ ပြန်လည် ကောင်းမွန်လာဖို့သာ မျှော်လင့်ထားပုံ ရပါတယ်။ ဒါနဲ့ ပတ်သတ်လို့လည်း ဂွါဒီယိုလာက “နှစ်ပတ် အတွင်း ကျွန်တော်တို့ ပိုကောင်းလာမှာပါ။ ကစားသမားတွေ ပြန်လာဖို့ ရှိပါတယ်။ နောက်ပြီး ကျွန်တော် တို့မှာ အသစ် ခေါ်ယူမှုတွေလည်း ရှိနေပါတယ်။” လို့လည်း ဆိုထားပါတယ်။
နောက်ဆုံး ပွဲမှာ ဘရတ်စ်ကို ၃ ဂိုးပြတ်နဲ့ အနိုင်ရခဲ့တဲ့ ရီးရဲလ်မက်ဒရစ် အသင်းရဲ့ နည်းပြ အန်ဆယ်လော့တီ ကတော့ မန်စီးတီးနဲ့ တွေ့ဆုံမှုကို ရှောင်ရှားလိုတယ်လို့ ပြောကြားထားခဲ့ပါတယ်။ ဒါပေမယ့်လည်း ဂွါဒီယိုလာ ကတော့ လက်ရှိမှာ ရီးရဲလ်မက်ဒရစ်နဲ့ ဘေယန်မြူးနစ်က သူ့ရဲ့ အသင်းထက် ပိုကောင်းကြောင်းလည်း ဝန်ခံသွားခဲ့ပါတယ်။
ဂွါဒီယိုလာက “သူတို့က ကျွန်တော် တို့နဲ့ ကစားရတာ ပျော်လားတော့ မသိဘူး။ တစ်သင်းက ပြိုင်ပွဲရဲ့ ဘုရင်၊ နောက်တစ်သင်းက ဒုတိယ ဘုရင် ဒါမှမဟုတ် တတိယ ဘုရင်လို့ ပြောလို့ ရတယ်။ ကျွန်တော် တို့က ဒီပြိုင်ပွဲကို ပြဿနာပေါင်း သန်းတစ်ထောင်နဲ့ ကစားနေပါတယ်။ သူတို့က ရေပန်းစားနေသူတွေပါ။ ဟုတ်ပါတယ်၊ အခု သူတို့က ကျွန်တော်တို့ထက်လည်း ပိုကောင်းနေပါတယ်။” လို့ ပြောကြားသွားခဲ့ပါတယ်။
မန်စီးတီး ပလေးအော့ဖ် အဆင့်မှာ ရင်ဆိုင်ရမယ့် အသင်းတွေ ဖြစ်တဲ့ ရီးရဲလ်မက်ဒရစ်ဟာ ချန်ပီယံလိဂ် ဖလား ၁၅ ကြိမ် ရရှိထားပြီး ဘေယန်မြူးနစ် ကတော့ ၆ ကြိမ် ရရှိထားပါတယ်။ကလပ် ဘရုဂေး ကတော့ မန်စီးတီးကို ရှုံးနိမ့်ခဲ့ပေမယ့်လည်း တစ်ဖက်မှာ စတုဂတ်က ပီအက်စ်ဂျီကို ဂိုးပြတ် အရေးနိမ့်ခဲ့တာကြောင့် ဂိုးကွာခြားချက်နဲ့ အဆင့် ၂၄ နေရာ ရရှိပြီး ပလေးအော့ဖ် ကစားခွင့် ရရှိခဲ့ပါတယ်။ ဒါကြောင့် ဘယ်လ်ဂျီယံ ကလပ်က လာမယ့် ပလေးအော့ဖ်မှာ အတ္တလန္တာ ဒါမှမဟုတ် ဒေါ့မန်နဲ့ ရင်ဆိုင်ရမှာလည်း ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.
