ချန်ပီယံလိဂ် ၁၆ သင်း အဆင့် ပထမအကျော့ရဲ့ ဘွန်ဒက်စ်လီဂါ ဒါဘီ ပွဲစဉ် မှာတော့ ဘေယန်မြူးနစ်က လေဗာကူဆင်ကို အလိုင်းရန့်ဇ် အရီနာမှာ ၃-၀ ရလဒ်နဲ့ ပြတ်ပြတ်သားသား အနိုင်ရသွားခဲ့ပါတယ်။ ဒီနေ့ပွဲမှာ လေဗာကူဆင်က ဘေယန်မြူးနစ်ကို အဘက်ဘက်မှာ ဘယ်လိုမှ မယှဉ်နိုင်ခဲ့ပဲ အရှုံးပေးခဲ့ရတာ ဖြစ်ပါတယ်။
ဘေယန်မြူးနစ်ဟာ လေဗာကူဆင်နဲ့ နောက်ဆုံး တွေ့ဆုံခဲ့တဲ့ ၆ ပွဲဆက် အသာမရခဲ့တာကြောင့် ဒီပွဲမှာလည်း ခက်ခဲလိမ့်မယ်လို့ တော်တော်များများက ခန့်မှန်းထားခဲ့ကြတာ ဖြစ်ပါတယ်။ ဒါပေမယ့်လည်း ဗင်းန်ဆင့် ကွန်ပနီရဲ့ အသင်းက လေဗာကူဆင်ကို တစ်ပွဲလုံး အကောင်းဆုံး ထိန်းချုပ် ကစားသွားခဲ့ပြီး လွယ်ကူတဲ့ နိုင်ပွဲ တစ်ပွဲ အဖြစ် ဖော်ဆောင်သွားနိုင်ခဲ့တာ ဖြစ်ပါတယ်။
ပွဲထွက် လူစာရင်းကို ပြန်ကြည့်ရင် ဘေယန်မြူးနစ် ဘက်မှာ တိုက်စစ်က ဟယ်ရီကိန်း ဦးဆောင်လာခဲ့ပြီးတော့ တောင်ပံ နှစ်ဖက်မှာ ကိုမန်၊ မိုက်ကယ် အိုလစ်ဆီ၊ ကွင်းလယ်မှာ မူဆီအာလာ၊ ကင်မစ်ချ်၊ ဂိုရက်ဇ်ကာ၊ ခံစစ်မှာ အူပါမီကာနို၊ ကင်မင်ဂျေး၊ အဲလ်ဖွန်ဆို ဒေးဗီးစ်၊ လိုင်မာနဲ့ ဂိုးမှာတော့ နော်အာပဲ ပါဝင်လာခဲ့ပါတယ်။ လေဗာကူဆင် ကလည်း အတောင့်တင်းဆုံး လူစာရင်းနဲ့ပဲ ဘေယန်မြူးနစ်ကို ပြန်လည် ရင်ဆိုင်သွားခဲ့တယ်လို့ ပြောနိုင်ပြီး ကိုဗာ၊ တာ့ရ်၊ မူကီလီ၊ ဟာမိုဆို၊ ဟင်ကပ်ပီ၊ ချာကာ၊ ပလာစီယို့စ်၊ ဝစ်ဇ်၊ ဖရင်မ်ပေါင်၊ ဂရီမဲလ်ဒို၊ အက်ဒ်လီ တို့နဲ့ ပွဲထွက်လာခဲ့ပါတယ်။
ပွဲစကတည်းက ဘေယန်မြူးနစ်က အပေးအယူ အချိတ်အဆက်မိမိ လျင်လျင်မြန်မြန်နဲ့ တိုက်စစ်ကို ပုံဖော်ဖို့ ကြိုးပမ်းခဲ့ပြီး ထိရောက်မှုလည်း ရှိခဲ့ပါတယ်။ ပွဲချိန် ၉ မိနစ် မှာတင်ပဲ အိမ်ရှင်တို့ ဦးဆောင်ဂိုး ရရှိခဲ့ပြီး တောင်ပံက မိုက်ကယ် အိုလစ်ဆီရဲ့ ဖန်တီးပေးပို့မှုကို ဟယ်ရီကိန်းက တိကျတဲ့ ခေါင်းတိုက်ချက်နဲ့ အဆုံးသတ်ပေးခဲ့တာ ဖြစ်ပါတယ်။ အဲဒီနောက်မှာလည်း ဘေယန်မြူးနစ် ကပဲ ဆက်လက် တိုက်စစ်ဆင်ခဲ့ပြီး ပထမပိုင်း အပြီးမှာတော့ ၁-၀ ရလဒ် ထွက်ပေါ်နေခဲ့ပါတယ်။
ဒုတိယပိုင်း ၅၄ မိနစ်မှာ ဘေယန်မြူးနစ်တို့ နောက်ထပ် ဦးဆောင်ဂိုး ထပ်ရခဲ့ပြီး ကင်မစ်ချ်ရဲ့ ကန်တင် ပေးပို့မှုကို လေဗာကူဆင် ဂိုးသမား ကိုဗာ ပေါ့ပေါ့ဆဆ တားဆီးမိရာ ကနေ လွတ်ထွက်လာတာကို မူဆီအာလာက ပိတ်သွင်းသွားခဲ့တာ ဖြစ်ပါတယ်။ ပွဲချိန် ၆၂ မိနစ် မှာတော့ ကိုမန်ကို တားဆီးပုံ ကြမ်းတမ်းခဲ့တဲ့ နောက်ခံလူ မူခီလီ နှစ်ဝါတစ်နီနဲ့ ထုတ်ပယ်ခံခဲ့ရတာကြောင့် လေဗာကူဆင်တို့ ပိုပြီး အားနည်းသွားခဲ့ပါတယ်။ ဒါ့အပြင် ၇၅ မိနစ်မှာ ဘေယန်မြူးနစ်တို့ တတိယဂိုး ထပ်မံရရှိခဲ့ပါတယ်။ တပ်ဆိုဘာ အနေနဲ့ ပင်နယ်တီ ဧရိယာထဲမှာ ဟယ်ရီကိန်းကို ဆွဲလှဲသလို ဖြစ်ခဲ့တာကြောင့် ဘေယန်မြူးနစ်တို့ ပင်နယ်တီရခဲ့ပြီး ဟယ်ရီကိန်း ကပဲ အကောင်းဆုံး အဆုံးသတ်ပေးခဲ့တာ ဖြစ်ပါတယ်။
လက်ကျန် မိနစ်တွေ မှာလည်း ဘေယန်မြူးနစ် ကပဲ ပွဲကို ဆက်လက် ထိန်းချုပ်ပြီး ဂိုးရနိုင်တဲ့ အခွင့်အရေးတွေ ရှိခဲ့ပေမယ့် ကံခေနေခဲ့လို့ ၃-၀ ရလဒ်နဲ့ပဲ ပွဲပြီးဆုံးခဲ့ပါတယ်။ ဒီနိုင်ပွဲကြောင့် ဘေယန်မြူးနစ်က ဒုတိယအကျော့ မကစားခင်မှာပဲ ချန်ပီယံလိဂ် ကွာတားဖိုင်နယ် အဆင့်ကို တက်လှမ်းဖို့ သေချာသလောက် ရှိသွားခဲ့ပါပြီ။ ဘေယန်မြူးနစ်ဟာ လေဗာကူဆင်နဲ့ နောက်ဆုံး တွေ့ဆုံမှု ၆ ကြိမ်ဆက် အနိုင်မရခဲ့မှုကို အဆုံးသတ်နိုင်ခဲ့တာလည်း ဖြစ်ပါတယ်။ တစ်ဖက် မှာလည်း လေဗာကူဆင် အတွက်က ဒုတိယအကျော့ အိမ်ကွင်းမှာ ကစားရမှာ ဖြစ်သည့် တိုင်အောင် ချန်ပီယံလိဂ် ကွာတားဖိုင်နယ်ကို တက်လှမ်းဖို့ ဝေးကွာသွားခဲ့ပြီလို့ပဲ ဆိုရမှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.
